Quantcast
Channel: مذكرات مريضة نفسيا
Viewing all 65 articles
Browse latest View live

يوميات اخوانيه فلوليه

0
0

 
 النهارده فى القطر كانت نص العربيه اللى انا راكبه فيها هاتنتخب شفيق وهما واقفين يتكلموا على الموضوع ده لقوا واحده ست تدخلت فى الحوار من غير مناسبه شتمت فى شفيق وفضلت تدعم الاخوان وبتقول:
(خليهم يحكمونا عشان يعفونا ) !
قام واحد هب فيها وقالها وانتى مالك ومالنا ماتروحى تنتخبى مرسى ده بعيد عننا وبعدين انتى اخدتى كام قزازة زيت عشان تقولى كده ؟:)))
 
كل الحوار ده فاكسان جدا وشفتوا 100 مره على الفيس وفى الشارع لكن مش دى كانت مشكلتى
ولكن توقفت عند كلمة (خليهم يعفونا )وبالرغم من ان الست خلقتها تعلم العفه لوحدها (سامحنى يارب)ولكن سألت نفسى سؤال مهم 
 هى الست دى مستنيه العمر ده كله مرسى والاخوان يعلموها العفه ؟
 وهى مش متعلماها لوحدها ليه ؟
ثم عشان تتعلم العفه تضيع مصر كلها ؟؟
 
سمعت الايام اللى فاتت رأى سطحى واهبل جدا
الناس فاكره انى مش عايزه الاخوان عشان البس براحتى  ومحدش يقولى البس نقاب ههههههههههههههه
ده على اساس انى مقطعه البكينى ؟ ولا طول النهار مش راحمه نفسى من الميكروجيب ؟
ماقدرشى انكر ان حريتى فى كل شىء سبب من الاسباب ولكن اقسم بالله العظيم ان لو ده تمن ازدهار البلد مش هابخل عليها بيه ويبقى ثمن قليل ولو شايفاهم كويسين هانتخبهم لكن انا بجد شايفه الاخوان سيئين وبيجروا وراء الكرسى والسلطه بأى طريقه ومش يهمهم ثوره ولا شهداء
بدليل انهم فضلوا كراسى مجلس الشعب عليهم واللى بيجننى ان انصارهم مش بيصدقوا حاجه عليهم وبيطنشوا عن افعالهم دى وبيحللوها ليهم كمان !
النهارده زعقت على الفيس وقلت 
انا حررررررررررررررررررررررررره 
اقول اللى انا عايزاه وانقد اللى انا عايزاه وانتخب اللى انا عايزاه 
,فى ثوره قامت فى البلد ولازم استفيد منها على قد ماقدر لانى مش عارفه بكره لو اتكلمت هافضل عايشه ولا هايقيموا عليا الحد ؟
ولا هى الثوره مقصود بيها بس المعايره والدم والمزايده وقلة الادب و لولانا ماكنتوش انتخبتوا ولولانا ماكنتوش اتهببتوا؟
وانتوا عبيد وجهلاء واغبياء ؟
 لا الثوره كمان لازم ترتبط بحاجات زى حرية الرأى والديمقراطيه والا لو فضلت اعمل حساب لحد اقبل ماقول رأى يبقى فى نظرى الثوره ملهاش لازمه 
زمان كنا بنخاف نتكلم عشان امن الدوله مايكرهبوناش بيتهيألى بقى دلوقتى لازم كلنا نتكلم وننقد وماحدش يخاف
وعلى الاخوان (وانصارهم)تقبل النقد بصدر رحب لو عايزين يثبتوا انهم اهل للمرحله القادمه المبنيه على الديمقراطيه واهل للانتخاب ولا ايه؟ :))
 
انا حاسه ان اصحابى اللى مش بيكتفوا بانهم يناقشونى على الفيس ولما بقفله بيجروا جرى يكملوا عليا فى التليفون عشان يقنعونى بالاخوان حاجه من الاتنين يا قابضين يا واخدين زيت وسكر!
 
انبسطت اوى لما استاذى اللى بيدربنى على العلاج النفسى كان رأيه سيكولوجيا فى الاخوان زى رأى تمام وهو كالأتى:
 ( حبستهم فى السجون خلتهم عندهم نهم للسلطه ولو اخدوها مش هايسبوها نهائى ولو حد من الثوار فاكر ان الاعتراض عليهم هايبقى سهل يبقى غلطان لأنهم هايمارسوا الاستبداد الدينى فى اشد صوره ودلوقتى المجلس او شفيق بيعملوا محاكم عسكريه انما الاخوان هايلموا الثوار لو عارضوهم ويعدموهم بحجة انهم كفرا وخارجين على الحاكم ومش هايغلبوا يجيبوا فتوى بكده وعشان كده هو هيختار شفيق بمنطق اقل الضررين)
وسيذكر التاريخ ان فافى لم تنصر الدين وتقاعست وتخاذلت و(كام كلمه مجعلصين كده عن اداء دورها الوطنى وبسببها بااااظت الثوره 
ده على اساس ان اللى قاطعوا فى المره الاولى ماكنوش من اسباب وصولنا للمفاضله بين شفيق والاخوان 
بالرغم من تعاطفى مع شفيق احيانا وبحس ان الناس مدياه اكتر من حجمه وانه مفترى عليه فى حاجات كتير ومش يستاهل الهجوم ده كله ده غير انى شايفه ان اسقاطه سهل جدا اكتر من الاخوان 
 لكن انا مش مقتنعه به رئيس للجمهوريه وشايفه انه لايصلح وعشان كده هاقاطع وماحدش يقرفنى ويقولى مانتى كده صوتك هايروح لشفيق هاقولوا يروح 
انا مش مضطره 
 وياريت نقرأ المقال ده فى واحد على عشره من اسباب ضيقى من الاخوان


هلاوس ليليه 6

0
0




واحده من إحدى اللحظات الكئيبه الممزوجه بتفكير عميق 

لسنا طيبين كما نعتقد  ولكن ندعى الطيبه لكى نستحوذ على إعجاب الاخرين ويحبوننا
 وبمرور الوقت نصدق أنفسنا 

كم أكره سماع كلمات الإطراء المبتذله التى يستخدمها الرجل للايقاع بالمرأه 

احيانا افكر بعمق قبل النطق بلا شىء او النطق بعكس افكارى تماما

أعشق التواصل بأقل عدد من الكلمات

يوترنى الشىء الغير مسبب  

كلام على الماشى

0
0


قبل الانتخابات كتبت فى المدونه جمله بتقول
 (قليل من السخريه من شفيق مايضرش ,ولكن كثير من السخريه من شفيق يجعله رئيس جمهوريه )
وقلت بكره تفهموا قصدى 

واظن بعد النتيجه الناس فهمت الجمله دى معناها ايه :)

النهارده بقى بقول لانصار الاخوان نصيحه (قليل من الدعم وا(لحشد)للاخوان مايضرش , كثير من الدعم و(الحشد)للاخوان يجعل برضه شفيق رئيس جمهوريه :)))
يارب نفهم

سيكولوجية مؤيدى الاخوان

0
0
أناعمرى ماشفت ناس بيجتمعوا على صفات واحده وبيتكلموا بنفس الطريقه وبيقولوا نفس الكلام  زى الاخوان ومؤيديهم (وانصارهم الجدد)
 وهاقول مين هما انصارهم الجدد فى الاخر


اللى لفت نظرى ان مؤيدى الاخوان  كلهم بيقولوا نفس الجمله لما تيجى تنقد الاخوان قدامهم يقولك اصل (الاعلام ظالمهم ) وكأن كل فضائيات الدنيا اتوظفت عشان تهاجمهم
ولما تيجى تقولهم ليه هو الاعلام اللى خلاهم يرجعوا فى كلامهم ويرشحوا الشاطر بعد ماقالوا (لم اكن انتوى الترشح )؟
يقوموا يردوا عليك بنفس الجمله دى:
 (طب الحمد لله انهم عملوا كده ورجعوا فى كلامهم تخيل بقى لو ماكنوش رشحوا حد كان هايبقى مين دلوقتى قدام شفيق ؟؟)
ولما تقولهم كانت فرصة صباحى هاتبقى اكبر لان لو شفيق قدام صباحى كان كل الاصوات هاتروح له لان فى ناس بتختار شفيق مجرد خوف من الاخوان ولو كان قدام شفيق صباحى كانت كل الاصوات هاتروح لصباحى لان مش تبع حزب مكروه 
يقوموا يسكتوا لما يلاقوا كلامك منطقى 

 ولما تقولهم انا مش بعتمد على كلام الاعلام ده انا شفت بعينى فى الانتخابات انهم موقفين ناس فى اللجان يقولوا للناس الاميين يعلموا على اخوان 
يقوموا هنا يفقدوا اعصابهم لانهم متأكدين ان ده حرام ويقولوا لك:
 (احنا مش ممكن نصدق ان الاخوان يعملوا كده )
وهما على فكره بيقولوا كده لنفسهم مش ليك عشان يقنعوا نفسهم ان الاخوان كويسين وكأنهم بيرددوا كده لنفسهم عشان مايضعفوش ويقلبوا عليهم 
مع انهم لو فكروا شويه هايلاقوا نفسهم انهم ابعد مايكون عن الحق والموضوعيه



كل مؤيدى الاخوان بيقولوا  لما الاخوان يغلطوا جملة ( احنا ماقلناش انهم ملايكه )لكن لما شفيق يغلط يبقى ابن كلب فلول

كل مؤيدى الاخوان بيقولوا لك (ان هما مش اخوان على فكره)
 نفس الاسلوب الزباله بتاع انصار ابو اسماعيل يقنعك الصبح تختاره ويقولك انه
( مش سلفى )ولا حاجه عشان يسبكها عليك وتلاقيه بالليل هو اللى بيعلق على عربيتك بوستر ابو اسماعيل

كل مؤيدى الاخوان بيطنشوا بل (ويداروا)على فضايح الاخوان وتجاوزتهم فى الانتخابات لما يكون ليهم مزاج لكن اول مايلاقوا حد تانى بيعمل اللى هما بيعملوه وازيد يقوموا يقولوا لك ( ماتروح تدور على فلان ماهو بيعمل وبيعمل )

كل مؤيدى الاخوان من العامه والجهله والغيرمثقفين بيقولوا لك 
( قول نعم للدين وانصر دينك )
 ده اذا يعنى مازودش على الجمله دى شوية ترهيب من عذاب النار ويمكن كمان يجيب لك ايه قراءنيه هما محفظينها له عشان يقنعك بيها

بعض مؤيدى الاخوان بقى يكتسبوا صفة التلامه يعنى مهما تقولهم هقاطع مافيش فايده هما مصممين تنتخب مرسى اللى عاوز كرسى  وعايزين يقنعوك بشتى الطرق
ولما تقولهم هانتخب شفيق على طول تبتدى المتاجره يقولوا لك 
( وحق الشهداء ؟:()
وكأن الشهداء دول ماكنوش موجودين ساعة انتخابات مجلس الشعب لما الاخوان نفضوا للثوره واللى جابوها وجريوا على الكراسى
 وفجأه كده بقى لازم ناخدلهم حقهم دلوقتى ودمهم فى رقبتنا؟
كل مؤيدى الاخوان بيكيلوا الامور بمكيالين يعنى لما شفيق يتجاوز فى الانتخابات يبقى يوم مش معدى لكن هما من حقهم يكلموا ارقام تليفونات عشوائيه عشان يقنعوهم بانتخاب مرسى 
وطبعا هما عارفين ان التزوير حرام وعشان كده مش بيزوروا هما بس بيدفعوا رشاوى عشان يشتروا اصوات بما لايخالف شرع الله 
  
 
الانصار الجدد بقى واللى الحمد لله اكتسبوا جميع صفات الاخوان القدامى اللى هما من وجهة نظرى اسوأ نوع من مؤيدى الاخوان 
 لان الاخوان نفسهم اكيد هايكونوا متحيزين لبعضهم
 والناس اللى بتساند الاخوان عشان متعاطفه معاهم من كتر الهجوم عليهم برضه بعذرهم 
والناس اللى بتأيدهم من زمان لله فى لله عشان شايفاهم الاصلح 
(وبيبلعوا ليهم الظلط )برضه على عينى وعلى راسى
  انما بقى اللى مش مفهوم ويكاد يكون مستفز
 الناس اللى كانوا بيكرهوهم وشايفين انهم سيئين وبيشتموا فيهم واختاروا فى الجوله الاولى ناس غيرهم مش منطقى انهم دلوقتى هايقنعونى ان الاخوان حلوين ومطلوب منى بقى انى اضحك على نفسى واصدقهم زى ماهما بيضحكوا على نفسهم  وبيقنعوا نفسهم ان مرسى كويس
عايزين تنتخبوا الاخوان انتخبوههم وانتوا عارفين انكوا بتعملوا كده عشان تسقطوا شفيق لكن انتوا عارفينهم على حقيقتهم 
انما تعيشوا الدور بقى بعد ماكنتوا بتشتموا فيهم وفجأه كده تقنعوا نفسكوا ان الاعلام كان ظالمهم زى:
الأخ ده
 وعشان كده
مضطره اقولكوا
معظمهم كان عندى على الفيس بيطنش ويمكن يعمل لايك على نقدى للاخوان ودلوقتى مش بيستحملوا الهوا عليهم :))
عجبت لكم يا متحولين 
عموما انا مش هانتخب اخوان لو اسما انبطقت على الارض وانا مستخيره ربنا ومرتاحه لقرارى جدا ولكنى هقاطع لان اعتراضى على شفيق مش عشانه لشخصه ولكن عشان اللى حواليه 
وهاحترم النتيجه مهما كانت لكن هافضل طول عمرى ناقمه وساخطه عليهم لانى مش بحبهم ومتأكده انهم افاقين وبتوع مصلحتهم وعمرهم ماكنوا وطنيين ابدا ولا بيحبوا البلد ولكن كل همهم السلطه والكرسى وبس ومصلحة الاخوان اولا فوق مصلحة البلد وعشان كده انصارهم ومؤديهم عارفين انهم لما يمسكوا هايظبطوهم لكن بقية الشعب بقى بما فيهم انصارهم الجدد هاياخدوا
 خازووووووق محترم
وجارى تحميل الخازوق

  

اينشتين والغباء

0
0




عرف إينشتين الغباء بإنه:
 فعل نفس الشىء مرتين بنفس الأسلوب ونفس الخطوات مع انتظار نتائج مختلفه 

وعرفت العبده لله الأغبياء بإنهم:
  هم من يروا مجموعه من الأشخاص يفعلون نفس الشىء اكثر من مره وبنفس الخطوات وبنفس الأسلوب ومع ذلك ينتظرون منهم أفعال و نتائج مختلفه 



أنا واحده من العاهرات اللى انتخبوا شفيق

0
0
 البوست ده موجه لأى واحد هايتكلم نص كلمه على ست مصريه انتخبت شفيق
 وبطالب كل ستات مصر مش منتخبات شفيق بس يطالبوا الاسوانى وعلاء صادق باعتذار عن تجاوزهم ده 
أفتح تويتر فى يوم ألاقى الشخص الغير محترم ده بيقول الكلام ده,
 أرد عليه على تويتر ألاقى بعديها بشويه 
 أقول ياربى ايه الغل ده مايحاسب النائم العام على سفره وبلاغاته هو ماله ومال مؤيدات شفيق ؟
أكتب له تعليق على مقالته وأرد عليه وامشى
ألاقى الناس على الفيس قاعده تشتم فى اللى إنتخبوا شفيق وتقول عليهم جهله وعبيد وخاينين للثوره 
ياخبر أبيض 
يعنى انا خاينه للثوره ؟
أقول ياواد طنش خااااااااالص وأقول أخدهم على قد عقلهم بدل ماكل يوم أهزأ حد وأسكت
 ألاقى حتى جهلة الجهلاء وأنصاف المتعلمين بينقدوا اللى إنتخبوا شفيق وإنى إزاى ماقلتش نعم للدين :)

 بلاش قلة ادب وخلينى أكون هاديه وأتناقش بالعقل والمنطق اللى المفروض يفهموه أنصاف المثقفين اللى زى علاء الأسوانى وعلاء صادق  وغيرهم من سلطاء اللسان

هل يصح إنكم تطلقوا أسماء على ناس هما شخصيا لم يختاروها لأنفسهم ؟
وهل يصح إنكم تقولوا لفظ عاهرات على سيدات مصراللى منهم أهلكم وجيرانكم لمجرد إنهم إنتخبوا شفيق ؟
وهل يصح التعميم ؟ 
وهل يصح ننصب نفسنا حكام ونتكلم بإسم الثوره ونحكم مين خاين ومين مش خاين ؟ 
عملتوا بحث حاله ودراسه على كل منتخبى شفيق وإتأكدتوا بالدليل القاطع إن
(كلهم )معاهم شهادة محو أميه ؟

بحثتوا فى سيكولوجية منتخبات شفيق وإتأكدتم بالدليل القاطع إن
(كلهم)  فتيات ليل مش عايزين غير شفيق الموز أبو بلوفر وياكشى تولع مصر ؟

عملتوا بحث حاله ودراسه على كل منتخبات شفيق وإتأكدتم بالدليل القاطع أن (كلهم) أرامل ؟
 فكرتوا قبل ماتهينوا الناس تسألوا نفسكم مين كان خصم شفيق والناس هربت منه ليه ؟وحملتوه هو وجماعته جزء من المسؤليه لانهم ماقدموش السبت
؟
طب انتوا عندكم فكره إن فيه ثوار كانوا فى ميدان التحرير ال18 يوم وحضروا موقعة الجمل وانتخبوا شفيق رئيس وزراء موقعة الجمل هروبا من الاخوان ؟
ولا بتضحكوا على نفسكم لسه وفاكرين ان دول (كلهم)حزب الكنبه وبتوع الاستقرار وعواجيز مصر وعبيدها:)))؟

طب انتوا عندكم فكره ان اسامه الغزالى حرب وجورج اسحاق المحسوبين على الثوار ومن اكبر المعارضين للنظام القديم إنتخبوا شفيق؟
(لازم عشان يرجعوا النظام القديم تانى مش كده؟)

طب انتوا عندكوا فكره انى بكتب النوت وخايفه تقع فى ايد حد اخوان يصفينى ؟

فكرتوا قبل ماتلوموا اللى انتخبوا شفيق تحللوا النوعيه اللى انتخبتوا دى تنتمى لأى فئه من الشعب ولا هل هى خليط من الفئات ؟

لا طبعا ماحدش عمل كل ده والكل بيستسهل الشتيمه والنقد وقلة الأدب وعامل فيها ابو العريف
وبيردد كلام حافظه ومش فاهم منه أى حاجه زى حق الشهداء اللى بنفتكروه بس لما نتكلم عن شفيق ؟
انما مرسى ؟
لا عادى ده مننا وعلينا
طالما من النظام الجديد خلاص مش مطالب يجيب حق الشهداء
ولا ستاتوس واحد  شفته بعد مامسك مرسى بيطالب بحق الشهداء  زى ايام شفيق ,زى مايكون حق الشهداء بقى تجاره زى الدين نستخدمه بس لما ييجى وقته  او نوع من انواع العند

ده لو كل ستات مصر انتخبوا شفيق ماحدش يقدر يلومهم بعد اللى شافوه من السلفيين والاخوان ومن الناس اللى ماكنتشى تقدر تفتح بقها زمان وكانوا ماشيين جنب الحيط وخايفين من امن الدوله اللى كانت لماهم دلوقتى بيتكلموا بمنتهى البجاحه و المنقبات بقت تنصح  (بتهديد )عشان حاسين ان البلد بقت بلدهم :)
(لا انا ماشفتش بعينى قابضه عشان اقول كده :)
ده مش كفيل يخلى الستات تطالب برجوع حسنى مبارك تانى مش ترشح شفيق ؟
أنا واحده من البنات اللى انتخبوه 
 كنت ناويه اقاطع ثم اخدت قرار بالابطال ولما لقيت النتيجه فى صالح مرسى صليت استخاره و نزلت قبل غلق اللجنه بساعه وانتخبت شفيق 
وفيه شريحه كتير زيى 
لانى مش عايزه تاجر دين 
ومش عايزه عروسه ماريونت فى ايد المرشد

ومش عايزه ناس تحكم وناس تحتها تهيص فى الهيصه وتيجى تتعدى على حريتى 
وعايزه واحد سهل اسقاطه لكن مش عايزه واحد هايركب هو وجماعته مش هاينزلوا 
ومش عايزه واحد لما اختلف معاه يكفرنى ويجيب فتوى بقتلى
ومش عايزه واحد يقولى يانا يا الفوضى ولا ماختوش بالكم:)
ايام مبارك كنت عارفه انى لما افضفض بكلمتين فى المدونه بكتيره هالاقى امن الدوله بتخبط على بابى تانى يوم لكن دلوقتى مش عارفه الضربه هاتجيلى منين ؟
ولا اى حد هايقول عليا خارجه عن الحاكم وحلال قتلى وتصفيتى؟

بتقولوا العالم هايضحك علينا لو اسقطنا نظام وجبنا رئيس وزراءه رئيس؟ 
طب والعالم مش هايضحك علينا لما يلاقينا ثورنا عشان حريه ,عداله اجتماعيه وبعد كده يلاقينا مش طايلين الحريه ولا العداله الاجتماعيه ؟
بمناسبة الحريه عندكوا فكره انى بمشى  فى الشارع خايفه عشان عامله الطرحه اسبانش او مش لابسه نقاب وانى عمرى ماكنت خايفه كده حتى فى عز الانفلات الامنى؟
عارفين كام اسره مسيحيه أعرفها مشيت من البلد يا بتوع العداله الاجتماعيه ؟
(اخرهم طنط هدى جارتنا راحت لابنها كندا بعد مامرسى كسب على طول)
(عملت بنصيحة الشيخ يعقوب)
(لا لا ده كدب المسيحين موجودين ماحدش مشى ولا حاجه انا قابضه عشان اقول كده )
اومال انتوا كنتوا بتعلموا ثوره لمين لنفسكم ؟ولا عشان تحققوا مجد شخصى؟
ولا عشان مصر الحيطان ومصر الشوارع
وطظ فى مصر البنى أدمين
ولا ثوره عشان ناس وناس لأ؟

مش هاقول ان اختيارى هو احسن اختيار ولا وجهة نظرى هى احسن وجهة نظر فى الدنيا بس على الأقل هى وجهة نظر تستاهل التوقف عندها والنقاش وليس التجريح وقلة الأدب والنعت والسب 
أنا بقى كبنت مصريه انتخبت شفيق اعتقادا منى ان ده فى مصلحة البلد 
هل انا عاهره ؟
هل انا جهله ؟
هل استحق يتقال عليا ارمله من ارامل شفيق ؟
هل استحق انه يتقال عليا خاينه للثوره؟
 كل نساء مصر من منتخبى شفيق او مرسى من اشرف النساء فى العالم وظفرهم برقبة اى حد يسبهم او يعتدى عليهم بالضرب (زى ماحصل ايام الانتخابات )عشان بس  بيعبروا عن رأيهم
وللعلم علاء الاسوانى وعلاء صادق ومحمود سعد مش بيعملوا كده عشان خاطر عيون الثوره والشهداء ولكن عشان تصفية حسابات خاصه مع شفيق لان كفه معلم على قفا كل واحد فيهم واللى مايعرفشى يدور
والأمر لا يتعدى كونه غيرة رجاله من رجل معظم ستات مصر بتحبه حتى ولو كان قاتل وسفاح

انا مش بدافع عنه لانه له ما له وعليه ماعليه ولكن بدافع عن حقى ووجهة نظرى فى اختيارى ليه
من حقى اختار اى شخص من غير سب وقذف لشخصى
انقدوه براحتكم لكن لا تخوضوا فى اعراض منتخبيه وهى دى الديمقراطيه اللى طول النهار بناخد منها حته ونسيب منها حته وطول النهار نكيل الامور بمكيالين

انا بحترم كل اللى انتخبوا مرسى وعمرى ماهجبر حد ينتخب واحد هو (شايف) ان ايده ملوثه بدماء شهيد وقع برصاصه جنبه
وعشان كده نفسى الناس تبطل تبقى اعداء للحريه ويبطلوا الكلام عن الصح و الغلط والحق وكأن الامور يا ابيض يا اسود واذا ماكنتش معانا تبقى ضدنا
عمر الامور مابتتحسب كده
 ملحوظه سيكولوجيه:  نسبه لا بأس بها من رجالة مصر بتنقده غيره منه وليس وطنيه والا ماكنوش يوجه كلامهم لينا إحنا الأرامل والعاهرات
:)))
اى رجل يوجه نقده للستات اللى انتخبوا شفيق اعرفوا على طول انه غيران منه مش غيران على الثوره
نصيحه سيكولوجيه: كل رجل بينقد شفيق يقعد مع نفسه ويدور جوه نفسه على السبب الحقيقى هل هو دم الشهداء  ولا البلوفر؟
ولو لقاه البلوفر لازم يشوف دكتور نفسى او ييجى اعالجه وافك له عقدة شفيق بس مايقرفناش بطولة لسانه ويطلع غله فينا احنا الستات الغلبانه




الطرف الثالث

0
0


أردت توثيق بعـض المعلومات التى ربما أحتاج إليها فيما بعد، أو تلق الضـوء على الحقيقة التى خـفيت على كثيـر من الناس، وكـنت أنـا منهـم.

أحد المستشارين القريبيـن من المستشـار فاروق سلطان وأحـد أقربائه، أفـادنى صباح اليوم الذى أعـلنت فيـه نتيجـة انتخـابات الإعادة، بأن النتيـجة أصـبحت محسـومة لصـالح أحمد شـفيق بنسـبة 99%. ولمـا أخـبرته بأن كل المؤشرات تدل على نجاح محمد مرسى، خصوصا بعد المؤتمر الصـحفى الذى أعـلنوه فى الرابعه صباحا ، أكد لى أن هذا الكلام غير صحيح، وأن الإخوان يسـتبقون الأحـداث بلعـبة سـياسـية خبيـثة تهـدف إلى التأثير على الرأى العام، واتهام المجلس العسـكرى مبكـرا بالتزوير فى حال فوز أحمـد شـفيق.
كما أكد لى صـحة وجـود أصوات مزوره بالمطابع الأميريه لصالح مرسى بالفعـل، وسـوف يتـم التحقيق فيها.
كان هـذا ما دار فى الحـوار بيـنى وبيـن المسـتشـار.

وبعد أن فوجـئت بإعـلان النتيجه لصـالح محمد مرسـى، حدثته تليفونيا غـير مصـدقة بمـا حدث، وكـيف انقـلبت الموازين فجـأة، وسـألته عن السـبب فيـما حدث، فأخـبرنى بأنه قـد تم اتخاذ سـلسـلة من القرارات المفاجئـة ولا يعـلم عن سـببها شـيئا: وهـى عدم التحقيق فى الأصوات المزوره بالمطابع الأميريه ثم إعـلان النتيجـة لصـالح محمد مرسـى. وقـد فوجـئ هو الآخـر بما حـدث وسـمع.

ُذهِـلْت لما سـمعت، وانتهـت المكـالمة وأنا فى قمة دهشـتى، لا أستطيع أن أجد تفسيرا لما سـمعت.

وفى مسـاء يوم 25/6 حاولت الإتصـال بإحـدى صـديقاتى المقربات تليفونيا، وأزعجـنى أنها لا ترد على غـير عـادتها، ولمـا اتصـلت بى مؤخـرا واعتذرت عن عدم الرد، ذكـرت أن السـبب فى ذلك هـو انشـغالها فى عـزاء بنت خـالتها، حـيث مات زوجهـا إثر حادثـة انفجـار مؤسـفة.
وبعـد تقصـى الأخـبار، إذ أنه ليس مألوفا أن يمـوت الناس فى حـوادث انفجـار. ثم علمـت فيما بعـد أن هـذا الشـاب إسـمه محـمود (28 عام)، مندوب مبيعات، متزوج من إبنة خالـة صـديقتـى منـذ 9 أشهر فقـط. وهو عضو فى جماعه سـلفية إسـلاميه تدعـم الإخوان المسـلمين. وقـد مات فعـلا إثر انفجـار قنبـله بإحـدى الشـقق فى مدينـة طـوخ بالقليوبيه، حـينما كان يحـاول إبطـال مفعـوله أو تعطيلها.

والواضـح أن هـذه الجـماعة الإسـلامية التى ينتمى إليها محـمود كانت تعـد العـدة لعـدة أعمال تخريبيـة يسـاندون بهـا جماعة الإخـوان المسلمين فى حـال فـوز شـفيق. وكـانوا يسـتهدفون بعـض المنشـآت الحـيويه وتفجـيرات فى مناطـق معـينه. ثم اسـتطردت صـديقـتى قائلـة: إن أمير هـذه الجماعه التى ينتمى إليـها محـمود دائما يحـدثه تليفونيـا ويأمره أن يأخذ زوجته ويذهبا إلى ميـدان التحرير، وأحيانا للعباسـيه، وأن هـذا الشـاب المتـوفى كان ينتمى إلى بعـض الجماعات السـلفيـة المتطـرفة، وقـد بـدأ حـياته بالفعـل عضـوا فى جماعة التكفير والهجرة.

وأكـدت لى صـديقتـى أن هـذه المعـلومات مؤكـدة، وأنها عرفتـها من بنت خالتهـا (زوجة محمود المتـوفى). وعلمـت منهـا أيضا، أن هؤلاء لا يعـتبرون التخريب جريمـة، بل جهـاد فى سـبيل الله، وهـذا ناتج طـبعا عن عمليـات غسـيل مخ ودروس وعظـية مكـثفة فيما بيـنهم.
ثم بعدها قرأت هذا الخبر

أنا شـخصـيا لا أعرف لماذا تذكرت حينها جملة محمد مرسى والبلتاجى وصفوت حجـازى وأحاديثهم الدائمة عن أن القيامة سـتقوم إذا فـاز أحمد شـفيق... إما مرسـى أو الفوضـى.
واسـتعادت ذاكـرتى بعـض أحاديث أحمد شـفيق وما ذكـره عن اللواء الروينـى وحـمزه، عـن أن بعـض الملتحـين كانوا يعـتلون أسـطح المنـازل المطـلة على ميـدان التحـرير يضربون ويصـيبون فى الجماهـير أثـناء موقعة الجمل.
ولا أجـد الآن بـدا من أن أطـرح على نفسـى بعـذ الأسـئلة السـاذجـة:
لماذا اخـتفى البلطجـية تقـريبا هـذه الأيام من ميـدان التحرير؟
لماذا لا نسـمع الآن عن حرائق متفرقه كما كان يحدث من قبل؟


أين الملثـم فى سـيناء وتفجـيرات أنابيـب الغـاز؟
أين قطـاع الطـرق فى الإحتجـاجات الفـئوية؟

أنا حقـيقة لا أهـدف لنشـر أكاذيـب أو ادعـاءات من أى نـوع، أو لدى هـدف آخـر سـوى حـب مصـر وأهـلها، والخـوف عليـها... لكنى أتسـاءل فقـط... والزمـان وحـده كفيـل بالإجـابة...

هل الإخوان المسـلمون هم الطرف الثالث ؟
تم التعديل لغويا بواسطة:

رحمته وسعت كل شىء

0
0




أتعاملمع وكأنه على مقربة منى
 تربطنى به علاقه ودوده ورحيمه
 نتجاذب أطرافالحديث خمس مرات يوميا 
 أطلب منه الكثيرويعطينى إياه على شرط أن أكون موقنه بالعطاء
 أتحدث معه ليلا  وأشكو له منألامى وظلمى وحاجاتى وأشعر إنه يطبطب علىقلبى ويطمأننى إنه سوف يساعدنى حتى لو بعد حين 
أحيانا كثيره أستشيره بأمورىودائما ما يكون عند حسن ظنى ويقوم بحسمإختياراتى 
 أخجل منه أحيانا إذا فعلت شىء يغضبه ولكن بعد إستعطافه وتعهدى له بأننى لن أكررها مره أخرىأشعر إنه راض عنى
 لا أنكر إننى شككت متعمدهبينى وبين نفسى فى وجوده كثيرا وذلك ليطمئن قلبى  وأشعر إنى واقفه على أرض صلبه لا تقبل الجدال زيادهعلى رغبتى فى أن أكون أكثرا إقتناعا وأقل إنسياقا وراء الثوابت
 ومع ذلك أشعربه راض عن محاولاتى للبحث عنه وغير مستاء بل يبتسم فى ترقب وثقه من إننى سأجدهيوما ما
 لم يتركنى كثيرا أتكلف عناء البحث عنه 
بحثت عنهحتى وجدته بقلبى وعقلى معا
 لطالما رددت إلى نفسى الكثيرمن الأسئله مثل :
 إذا لميكن وجوده حقيقى إذن من الذى يعطينى ما أطلبه ؟
من الذى يمنع عنى الشر وأنا على شفاحفره من الوقوع فيه؟
من الذى يذهب البأس عنى ؟ 
من الذى يجيرنى فى مصائبى ؟
 هو الله الواحد الأحد


أتذكرإننى كنت دائما أثور عندما يحدث لى أى شىء سىء ويجنن جنونى وعندما أفعل ذلك لا تحلأمورى بسهوله بل ويزيد تعقيدها 
  هى ايه لها مفعول السحر حين أرددها تسهل الأمور مهما كانت صعوبتها  وتنفرج أساريرى 

أشعر دائما أن أفضل صفاته هى الرحمه لأننى عندما أتخيل بعض الأشياء السيئه التى من الممكن أن تحدث لى أشعر بحزن بالغ ولكننى أقول لنفسى أن الله ليس قاسى حتى يبتلينى هذا الإبتلاء وبالفعل يكون ربى عند حسن ظنى به 

ولذلك أفعل الصالحات لإكتساب رضائه فقط وليس طمعا فى الجنه وهروبا من النار وأشعر دائما أن خير مافعله للبشريه هو وجوده 


 أستاءمن نفسى كثيرا عندما أعبده على حرف إذا أصابنى خير إطمأننت به وإذا أصابتنى فتنهإنقلبت عليه وأتمنى دائما أن أتذكر الخير الكثير الذى أعطانى إياه وأنا فى الإبتلاء
 
أندهشكثيرا عندما أسمع حجج الملحدين وأحيانا أتخيل أنهم لم يبحثوا عنه حتىيجدوه ولكنهم إستسهلوا طريق الضلال 
وأحيانا أخرى اشعر أن الله سبحانه وتعالى قادرعلى أن يهيىء سبل الوصول إليه إذا أراد ولذلك فهو قادر على أن يشعرهم بوجوده ولكنه لا يريد ذلك لانه غير راض عنهم بالأساس
 وهو أعلم

 بعض من الأيات المحببه بالنسبه لى:

وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ
وَعَسَى أَنْ تُحِبُّوا شَيْئًا وَهُوَ شَرٌّ لَكُمْ
وَاللَّهُ يَعْلَمُ وَأَنْتُمْ لَا تَعْلَمُونَ

ولا يفلح الساحر حيث اتى

ولا يحيق المكر السيئ إلا بأهله

انه من يتق ويصبر فان الله لا يضيع اجر المحسنين
 ومن يتوكل على الله فهو حسبه

ولن يخلف الله وعده

وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ
فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ

من يتق الله يجعل له مخرجا 

 لا يكلف الله نفسا الا وسعها

ومكروا ومكر الله والله خير المكرين

وعزتي وجلالي لأنصرنك ولو بعد حين

 أغير الله أبغي رباً وهو رب كل شيء
   ‏
خُذْ الْعَفْوَ وَأْمُرْ بِالْعُرْفِ وَأَعْرِضْ عَنْ الْجَاهِلِينَ
 .
فَبِمَا رَحْمَةٍ مِنْ اللَّهِ لِنْتَ لَهُمْ وَلَوْ كُنْتَ فَظًّاغَلِيظَ الْقَلْبِ لاَنْفَضُّوا مِنْ حَوْلِكَ فَاعْفُ عَنْهُمْوَاسْتَغْفِرْ لَهُمْ.

وَرَحْمَتي وَسِعَتْ كُلَّ شَي.

عيد ميلاد مدونتى

0
0
 
 
 
يوم 8/1  المدونه بقت عمرها سنتين 
طبعا أنا عمرى ما إعتقدت فى نفسى الموهبه إطلاقا وطول عمرى شايفه نفسى مش شخصيه موهوبه أو إبتكاريه على الإطلاق (الا فى بعض الحاجات طبعا) (وش بيغمز)
ولحد دلوقتى بصراحه شايفه كده 
سبب أنشاء المدونه
ولكن سبب إنى عملت المدونه دى إنى نفسى أفكارى وأرائى تطلع للنور ويستفيدوا منها الناس حتى ولو كانت طالعه من حتة بت لا راحت ولا جت زى مانا كاتبه فى وصف المدونه  وأتمنى جدا إن يكون ده حصل فعلا
ظروف إنشاء المدونه
  كان نفسى أعمل كتاب وأكتب فيه أرائى أوى وبعدين نصحتنى صديقه إنى بدل ما أعمل كتاب أعمل مدونه وأشوف رأى الناس فيها وبعدين لو عجبتهم أعملها كتاب بس اللى حصل ان المدونه طلعت سمك لبن تمر هندى 
بمعنى أنها بتتكلم فى كل حاجه وفى أى حاجه شويه سياسه وشويه دين وشويه علاج نفسى وبقى مستحيل تتحط كل المواضيع دى فى كتاب واحد
ستايل المدونه 
 راعيت إن يكون كل ذره فى المدونه فيها جزء من شخصيتى يعنى قالب المدونه وألوانها والساعه وكارنيجى ومزيكتى المفضله يعنى بإختصار جعلتها تتحدث عنى 
فى ناس شايفه إن ده نوع من أنواع البارنويا 
مممممممممم جايز برضه :))
 المهم إن من ساعتها بقى بلوجر عالمى المفضل أكتر من الفيس وتويتر وهو العالم اللى بلاقى فيه الهدوء والرقى (الى حد ما ) (وش مبتسم)
تعليقات المدونه 
طبعا ماقدرشى انكر ان فيه تعليقات كتييييييير بتشجعنى وبتخلينى أكمل ولكن فى نفس الوقت بالرغم من إن لسه لم يولد اللى يحبطنى لكن لقيت تعليقات أمنيتها النيل منى 
والمثابره فى إستفزازى بس على مييييييييييييييييين (وش بيغمز)
بلوجر
على مدار السنتين اللى فاتوا زرت بيوت كتير فى بلوجر منها اللى خبطت ودخلت بس مالقتش حاجه تستاهل ومنها اللى زرته وزيارته جت بفايده و إتعلمت منه كتييييير أوى ومنها اللى لم يجيد أداب الضيافه 
المهم إن بلوجر يعتبر عالم خصب لأى مشتغل بعلم النفس لإنه بيدى فرصه إنه يقتحم سيكولوجية البشر بإذن منهم 
ويتعرف على ألامهم وأحزانهم وأمالهم وأفكارهم ومخاوفهم 
شكر
 بشكر أصحاب مدونات ساعدوا فى إن المدونه تظهر بالشكل الحالى وهما:
 
رشا فرج  (إلهام ولا أحلام) 
حسنى محمد (مذكرات مريض نفسى) 
منى الغرباوى ( my own space ) 
سما (الشوكه الناعمه )

كل سنه وانتى مفيده يا مدونتى 

 
 

رجل من هذا الزمان

0
0



هذا الرجـل لا يمكن أن تدخل عالم العلاج النفسى دون أن تعرفه.... فهـو إنسان ملأ الله قلبه راحـة وهـدوءا فانعكس على وجهـه نـورا وتألقـا... حـينما تجلس معـه للمـرة الأولى، تشـعر أنك تريد أن تفتـح خزائن أسـرارك أمـامه يسـمع منهـا ما يشـاء ....

رجل حـسن الخـلق... وهـبه الله من الصفات الحميدة، والنفس العظيمة، ورجاحـة العقـل... ونقـاء الروح، ما يجعـله يبـدو واثقـا من نفسـه ... لا يتحسس خطـاه ، بل يضـع قدمه يثبـات فى المكان والزمان المناسـب وقتـما يشـاء.

أعـماله وأبحـاثه وكلماته سـوف تُخَـلِّدُ ذكراه عطـرةً ومبهـرة، وسـوف ترفع قـدره أمام الأجـيال .... فهـو رجل تهـتدى به العقـول التائهـة والشـاردة فى غياهـب الحـياة وأثقـالها... وتنهـل منـه القـلوب الظـمأى التى ذبحـها النكـد والكـدر.

لقـد جمع حـوله عشـاق العلاج النفسى من كل مكان، بمخـتلف طـبقاتهم وانتماءاتهم وأهـوائهم وخـبراتهم وتوجهـاتهم... ثم فجـر فيهـم ينابيع المهارات والأفكـار... تيـارات تتـدفق لا تجـف ولا تأسـن.... يسـتطيع بعواطـفه الدافـئة أن يؤسس روابط الود والرحـمة بينه وبين مريديه... ويوقظ ما توقـف من أسـباب الحـياة فيهم ... فعلى الرغـم من أنـه يسـمح فى بعـض الأحـيان بالمزاح فيما يفيـد أو يجـلب أفكـارا جديـدة، إلا أنه يقـدس النظـام والإنضـباط والإلـتزام فى مجموعـته العـلاجـية.. بشـكل جـذاب وتربوى.

تسـتطيع أن تفهـمه سـريعا من خـلال ابتسـاماته المتعـددة... تلك الإبتسـامات الخاصـة بمرضـاه ... إنهـا لغـة حسـية وإشـارات وموجـات وديـة يرسـلها إليهم فى صـور متعـددة... فبسـمة منه تقـول: "أعرف أنك تعانى... وأتعاطف معك".... وبسـمة أخـرى تقـول: "أنحـنى احتراما لاسـتبصارك بذاتك".... وثالثـة تقـول: " أقدرك وأشجعك".... وأروع هـذه الإبتسـامات من تقـول: "برافـو"... أو "أشـكرك... أخجلت تواضعى"... هـذا بالإضـافة إلى ابتسـامات أخرى يخص بهـا زملاء المهنة أيضـا.

إذا رأيته وهو يتبع فنية السـيكودراما سـوف يبهـرك ويدهشـك ... لدرجة أنك سـتعـتقد أنـه سـاحر مبدع يقف على سـطح المـاء... فهـو يتحدث بلسـان المريض ويعـبر عن ما يشـعر به المريض فى داخـله... وربمـا يخـبره بأدق الأشـياء التى لا يريد الإعتراف بها...
ثم يهمس فى أذنـه متسـائلا: "هل ما أقـوله صحيح" ؟.... فيومئ المريض برأسه إيجـابا واعـترافا....
حـينئذ يعـود هـذا الرجـل إلى كرسيه فى ثقـة وهـدوء تاركا دمـوع المريض تنهمر ..... أمـا نحن المشـاهدين – فتملـؤنا الدهشـة ويذهـلنا الإعجـاب بفراسـة الرجـل.

لا يزال يهـتم بكل أفـراد الجلسة العلاجيه فـردا فـردا... وكأنه يدرب كل فـرد بمفرده تدريبـه الخاص به.... كمـا يهـتم بكل مريض على حـده، وكأنه يعالجه حـالته بخصـوصـية منفردة.


من يقـترب منـه يجـده يكرس حياته للعلم والعمل معـا... يدقق ويفيض ويفسـر فيـما يكـتب، بحـيث يعطـى القـارئ كل ما يحـتاجه من معطـيات وخـيوط فلا ينقصـه شـئ كى يفهـم المـادة العلميـة كما ينبغـى.... إنـه حـقا شـخصية نبيـلة ومرموقة تتدفق عـلما وتألقـا .... أتمنى أن أصـل يوما إلى شـواطئ علمه ومكـانته.

إنـه الطـبيب / محمود حموده .... أسـتاذى ومعـلمى وقـدوتى.... وصاحب الفضل بعـد الله على الكـثيرين من عشـاق العـلاج النفسى... الرجـل الذى جسَّـد النجـاح فى أجل صـوره... فجعـل منـه تفـوقا يمشـى على قـدمين.

أرجـو لك ياأسـتاذى سـعادة مع نفسـك تفوق ما تتمنى.... وطـول العـمر حـتى تنهـل الأجـيال من خـبراتك وعـلومك.... وفقك الله دائما.


عٌدل لغويا بواسطة/
 أ/محمد الشناوى

الجحيم هم الأخرون

0
0




أشعر وكأننى جزء من مسرحيه دراميه شديدة الحبكه أنا بطلتها الوحيده
 وكل المحيطين بى مجرد كومبارس يؤدون الأدوار الثانويه ببراعه حتى يستطيعوا إيهامى أننى فى دنيا حقيقيه لها رب وأخرها حساب
 بعضا منهم يؤدون أدوارهم ببراعه إلى الحد الذى أصدق فيه أننى فى عالم حقيقى ولكن البعض الأخر لا يجيدون لعب أدوارهم كما ينبغى وحينها فقط اكون على يقين من أننى فى دنيا مزيفه
وعالم إفتراضى صنعه أحد الأشخاص
وجعلنى الجزء الأعظم منه
أشعر أنه إستخدام هؤلاء البشر جميعا من أجلى فقط
 لكى يعرف ردة فعلى تجاه كذبهم وخداعهم ونفاقهم 
ترى من فعل ذلك؟
من استخدم هذا الكم الهائل من البشر لكى يقوموا بخداعى ؟
وما الأسباب التى دفعته لهذا؟
لا أحب أن أكون جزءا من ذلك
 أشعر أننى دميه شديدة السخف
 إنهم يتهامسون و يرموقننى بنظرات خبيثه
يتحدثون عن تلك البلهاء التى تصدق كذبهم وخداعهم طوال هذه السنوات؟
!إنهم يتأمرون على
!يريدون النيل منى
ولكننى أتسائل إلى متى سيستمرون فى خداعى ؟
ترى هل يريدون التخلص منى ؟
أشعر أن النهايه إقتربت
 وقد أوشك الستار أن يسدل على أخر مشاهد المسرحيه
 وهم يعترفون الواحد تلو الأخر بخديعتهم
هناك من سيقول لى كنت أؤدى دور والدك الذى أهملك
  الوهناك من سيقول لى كنت أؤدى دور حبيبك تركك
 وهناك من ستقول لى كنت أؤدى دور صديقتك التى خانتك
ولكن يتبادر إلى ذهنى سؤال
 هل يتعاونون بغرض تدميرى أم تلقينى درسا؟
و من إختارنى لأكون البطله؟!

سياسة القطيع

0
0


هو أنا ليه حاسه إن فيه مخطط نفسه ومنى عينه ينال من الجيش المصرى بكل رموزه ويكسر نفسه؟
ليه حاسه إن فى أيادى خفيه بتحاول تطمس تاريخ البلد عشان أهداف معينه؟
والغريب إن (الأغبيه ومتبعين سياسة القطيع) هما برضه اللى بيساعدوا الأيادى دى انها توصل للى فى دماغها
يعنى إيه فجأه فى ذكرى ثورة يوليو نبص نلاقى ناس طالعه تنقد فى الثوره وتقول عليها إنها جابتلنا الهم على اعتبار ان ثورة يناير جابت لنا الهنا كله ؟!


ومقلتوش الكلام ده قبل كده ليه؟
 
ويعنى إيه فجأه فى ذكرى وفاة عبد الناصر
نبص نلاقى ناس طالعه تنقد فيه ولم يذكروا حتى محاسن موتاهم ولكن بيعددوا مساوئه وكأن مرسى أنجز إنجازات هايله ؟!
 
ومقلتوش الكلام ده قبل كده ليه؟

 
ويعنى إيه فجأه وإحنا داخلين على إحتفالات 6 اكتوبر نبص نلاقى ناس طالعه تقول المفروض إننا مانحتفلشى باليوم ده تانى واكتشفوا فجأه خير اللهم اجعله خير اننا لم ننتصر !!!!

ثم حتى لو إتلغت عشان مافيش ميزانيه للاحتفال اومال فى ميزانيه بس لتأمين صلاة مرسى كل جمعه؟

ومقلتوش الكلام ده قبل كده ليه ؟
عايزين تلغوا تاريخنا ليه ؟
عايزين تمسحوا الجيش بتاريخه بأستيكه ليه؟
طب الإخوان وإحنا عارفين إن ناصر حارقهم عشام معلم على قفاهم لكن أنتوا ياللى بتطبلوا  بتطبلوا ليه؟!
بلاش ناصر 
دماء المصريين اللى سالت دى ملهاش تمن عندكم ولا لها قيمه؟
ومقلتوش الكلام ده قبل ماييجى الإخوان ليه؟!
ولا هى أى حاجه يقولها الإخوان تبقى صح ؟
بطلوا سياسة السمع والطاعه دى وشغلوا مخكم؟

اللى مالوش ماضى مالوش حاضر ومالوش مستقبل يا بقر؟

إستبداد وإستعباد (1)

0
0


سمعت كثيرا بإسم كتاب (طبائع الإستبداد ومصارع الإستعباد) لعبد الرحمن الكواكبى أثناء مراحلى الدراسيه
 ولكن كان يمر عليا مرور الكرام حيث أننى فى سن صغيره و كنت لا أهتم بالقرءاه  كما أنا الأن
 وخاصة إذا كان عنوان الكتاب من النوع الذى يوحى بالملل
 ولكن بعدما أصبح لى باع طويل فى القرءاه وأصبحت أقرأ كل ماتقع عليه عيناى حتى ولو كان مكتوب فى جريده قديمه مفروشه على منضده تختلط الأخبار بها ببقايا الطعام وأيضا أخذ إهتمامى بعالم السياسه يبزغ إلى السطح 
رأيت الكتاب من جديد أثناء وجودى فى معرض القاهره الدولى الأخير وعندئذ تذكرت عنوانه وأصبحت شغوفه بقرءاته 
وبمجرد ما بدأت فى قراءة صفحاته الأولى حتى تأكدت إن روح عبد الرحمن الكواكبى تحوم حول مصر وترى مانحن فيه من استبداد ليس له نهايه
 وتأكدت أيضا إنه عندما كان يتحدث عن الإستبداد والدين كان يقصد حتما جماعة الإخوان المسلمين وخاصة إنه مات متأثرا بسم دس له فى فنجان القهوه :D
ولكنى إكتشفت بعد ذلك أن فكر هذا الرجل سابق لعصره حيث توفى سنة 1902 ونشأت الجماعه سنة 1928وهذا أن كان يدل على شىء يدل على أن الإستبداد الدينى منهج وفكر ليس مرتبط بجماعه معينه
 تحدث الكواكبى فى هذا الكتاب ليس عن علاقة الإستبداد بالدين فحسب
 ولكن تحدث عن علاقة الإستبداد بالعلم والمجد والمال والأخلاق والتربيه والترقى وأيضا تحدث عن كيفية الخلاص منه 
وهذا مالم تفعله مصر حتى الأن للأسف

وبالرغم من إنى أدعو الجميع لقراءته 
سأقوم بعرض أفضل الأجزاء للقارىء فى أكثر من بوست 
حتى يستفيد الجميع بأقل مجهود .... يتبع
 
 

استبداد واستعباد (2)

0
0




ماهو الإستبداد
المستبد يتجاوز الحد مالم ير حاجزا من حديد ,فلو رأى الظالم على جنب المظلوم سيفا لما يقدم على الظلم كما يقال : الاستعداد للحرب يمنع الحرب 

المستبد يود أن تكون رعيته كالغنم درا وطاعه والرعيه ((العاقله )) تقيد وحش الاستبداد بزمام تستميت دون بقائه فى يدها لتأمن من بطشه فإن شمخ هزت به الزمام وإن صال ربطته 

الظالم سيف الله ينتقم به ثم ينتقم منه كما جاء فى أثر أخر (من أعان ظالما على ظلمه سلطه الله عليه 

إن الله عادل مطلق لا يظلم أحدا ,فلا يولى المستبد إلا على المستبدين (كما تكونوا يولى عليكم )

الاستبداد والدين
هم مخطئون إذا نظروا إلى القرءان جاء مؤيدا للاستبداد السياسى
فى الأمم الغابره المنحطه يوجد دعوى بعض المستبدين الألوهيه على مراتب مختلفه حسب إستعداد أذهان قدسية يشارك بها الله أو تعطيه مقام ذى علاقه مع الله 

القراءن الكريم مشحون بتعاليم إماتة الاستبداد وإحياء العدل والتساوى حتى فى القصص منه , ومن جملتها قول بلقيس ملكة سبأ من عرب تبع تخاطب اشراف قومها Lيأيها الملأ أفتونى فى أمرى ما كنت قاطعه أمرا حتى تشهدون ,قالوا نحن أولو قوة وأولو بأس شديد , والأمر إليك فانظرى ماذا تأمرين ,قالت إن الملوك إذا دخلوا قريه أفسدوها وجعلوا أعزه أهلها أذله وكذلك يفعلون )
وأسفاه على الدين الذى فقد الأنصار الأبرار والحكماء الأخيار فسطا عليه المستبدون والمترشحون للاستبداد ,واتخذوه وسيله لتفريق الكلمه وتقسيم الأمه شيعا وجعلوه أله لأهوائهم السياسيه فضيعوا مزياه وحيروا أهله بالتفريغ والتوسيع والتشديد والتشويش 

الاستبداد والعلم
ترتعد فرائض المستبد من علوم الحياه والسياسه المدنيه والتاريخ المفصل والخطابه الأدبيه ونحو ذلك من العلوم التى تكبر النفوس وتوسع العقول وتعرف الإنسان ماهى حقوقه وكم هو مغبون فيها وكيف الطلب وكيف النوال وكيف الحفظ 

العوام هم قوة المستبد بهم عليهم يصول ويطول يأسرهم فيتهللون لشوكته ويغصب أموالهم فيحمدونه على إبقائه حياتهم ويهينهم فيثنون على رفعته ويغرى بعضهم على بعض فيفتخرون بسياسته 

الاستبداد والمجد
المستبد يجرب فى المناصب والمراتب بعض العقلاء الأذكياء أيضا اغترارا منه بإنه يقوى على تليين طينتهم وتشكيلهم بالشكل الذى يريد فيكونوا أعوانا خبثاء ينفعونه بدهائهم 

الاستبداد والمال
حفظ درهم من الذهب يحتاج الى قنطار من العقول
الاستبداد يجعل المال فى أيدى الناس عرضه لسلب المستبد وأعوانه عماله غصبا او بحجه باطله 

قرر الأخلاقيون ان الانسان لا يكون حر تماما مالم تكن له صنعه مستقل فيها اى غير مرؤؤس لأحد لان حريته الشخصيه تكون نابعه لارتباطه بالرؤساء وعليه تكون اقبح الوظائف هى وظائف الحكومه
من يملك عشره يجد نفسه محتاج لعشره ومن يملك الفا يرى نفسه محتاج لالف اخرى وهذا معنى الحديث (لو كان لابن ادم من ذهب احب ان يكون له واديان )
يتبع .....

إستبداد وإستعباد (3)

0
0


الإستبداد والأخلاق 
 شاعت بين الأسراء قواعد كثيره باطله كقولهم :اذا كان الكلام من فضه فالسكوت من ذهب وقولهم البلاء موكول بالمنطق وقد تغالى وعاظهم فى سد أفواهم حتى جعلوا لهم أمثال هذه الأقوال من الحكم النبويه وكم هجوا لهم الهجر والغيبه بلا قيد فهم يقرأون 
( لا يحب الله الجهر بالسوء من القول ) ويغفلون بقية الأيه وهى (إلا من ظٌلم)

معاناة إصلاح الأخلاق من أصعب الأمور وأحوجها الى الحكمه البالغه والعزم القوى وذكروا أن فساد الأخلاق يعم المستبد وأعوانه وعماله ثم يدخل بالعدوى إلى كل بيوت الطبقات العليا التى تتمثل بها السفلى 

يوجد زعماء إستباحوا القساوة فأخذوا مهجورات دينهم قاعده (الغايه تبرر الوسيله) كجواز السرقه إذا كانت الغايه منها صرف المال فى سبيل الخير

الشرقى يهتم فى شأن ظالمه إلى أن يزول عنه ظلمه ثم لا يفكر فيمن يخلفه ولا يراقبه فيقع فى الظلم ثانية فيقع فى الكره ويعود الظلم الا مالا نهايه وكأولئك الباطنه فى الإسلام فتكوا بمئات أمراء على غير طائل وكأنهم لم يسمعوا بالحكمه النبويه
 (لا يلدغ المؤمن من جحر مرتين)

 الأمر الغريب أن كل الأمم المنحطه من جميع الأديان تحصر بلية إنحطاطها السياسى فى تهاونها بأمور دينها ولا ترجو تحسين حالتها الإجتماعيه إلا بالتمسك بعروة الدين ولنعم الاعتقاد لو كان يفيد شيئا لكنه لا يفيد لانه قول لا يمكن ان يكون وراءه فعل 

نعم الدين يفيد الترقى الاجتماعى إذا صادف أخلاقا فطريه لم تفسد ولكن مع الاسف ان اكثر الناس لا يحفلون بالدين الا اذا وافق اغراضهم او لهوا ورياء 

الإستبداد والتربيه 
من قوانين حياة الأسير التظاهر بفقدان الحس أو تعطيله وستر العلم بالتجاهل والإرتداء بالتدين والرياء وعزو كل خير إلى فضل المستبدين حتى إذا كان هذا الخير طبيعيا نحو مطر السماء فعزوه الى يمن الحكام او دعاء الكهان

إستبداد وإستعباد (4)

0
0


الإستبداد والترقى 
الترقى بالإنسانيه منتهى الترقى 
لا شك ان الدين اذا كان مبنيا على العقل  يكون افضل صارف للفكر عن الوقوع فى مصائد المخرفين وأنفع وازع يضبط النفس من الشطط وأقوى مهذب لتهذيب الأخلاق 

القرءان الكريم إذا أخذناه وقرأناه بالتروى فى معانى ألفاظه العربيه وأسلوب تركيبه فحينئذ لا نرى فيه من أوله إلى أخره غير حكم يتلقاها العقل بإجلال والإعظام

لولا أن الماديين والطبيعين  يأبون الاسترسال فى البحث فى صفات مايسمونه ماده أو طبيعه لالتفوا ولا شك مع الاسلام فى نقطه واحده فارتفع الخلاف العلمى وأسلم الكل لله

 ياقوم  هون الله مصابكم تشكون من الجهل ولا تنفقون على التعليم نصف ماتصرفون من التدخين وتشكون من الحكام فلا تسعون لاصلاحهم وتشكون من الفقر ولا سبب له غير الكسل هل ترجون الصلاح وأنتم يخادع بعضكم بعضا؟

إن جرثومة ذاتنا هى خروج ديننا عن كونه دين الفطره والحكمه وجعلناه دين البدع والتشديد ودين الخلل والخبال 

إنى لا أرى أمامى أمه تعرف حقا معنى لا إله إلا الله بل أرى أمه خبلتها عبادة الظالمين 

نحن ألفنا الأدب مع الكبير ولو داس رقابنا وألفنا الإنقياد ولو إلى المهالك وألفنا أن نعتبر التصاغر أدبا والتذلل لطفا 

المسلمون يقابلون تلك القوات بما يقال عند اليأس وهو حسبى الله ونعم الوكيل ويخالفون أمر القرءان لهم بأن يعدوا ما إستطاعوا من قوة لا ما استطاعوا من صلاه وصوم 
يتبع ....


إستبداد وإستعباد (5)

0
0


الإستبداد والتخلص منه 
الأمه التى لا يشعر كلها أو أكثرها بألام الإستبداد لا تستحق الحريه 

الاستبداد لا يقاوم بالشده انما يقاوم باللين والتدرج

يجب قبل مقاومة الاستبداد تهيئة ماذا يستبدل به الاستبداد 

قد تنقم الأمه على المستبد نادرا  ولكن طلبا للإنتقام من شخصه لا طلبا للخلاص من الاستبداد , فلا تستفيد شيئا إنما تستبدل مرضا بمرض كمغص بصداع
(وبالمناسبه ده اللى عملوا شعب مصر عندما قام بثوره ضد مبارك للانتقام من شخصه وفى طريقه الان لصنع مبارك اخر )
الوسيله الوحيده لقطع دابر الاستبداد هى ترقى الأمه فى الإدراك والإحساس وهذا لا يأتى إلا بالتعليم والتحميس

قاعده مهمه : يجب قبل مقاومة الاستبداد تهيئة ماذا يستبدل به الاستبداد وهو معرفة الغايه شرط طبيعى للاقدام على كل عمل كما ان معرفة الغايه لا تفيد شيئا اذا جهل الطريق الموصل اليها بل لابد من تعيين المطلب والخطه تعيينا واضحا موافقا لرأى الكل او الاكثريه التى هى فوق ارباع العدد والا فلا يتم الامر 

يلزم اولا تنبيه حس الامه بألام الاستبداد ثم يلزم حملها على البحث فى القواعد الاساسيه السياسيه المناسبه لها بحيث يشغل ذلك افكار كل طبقاتها والحذر كل الحذر ان يشعر المستبد بالخطر

نتيجة البحث :ان الله جلت حكمته قد جعل الامم مسؤؤله عن اعمال من تحكمه عليها .وهذا حق . فا إذا لم تحسن امه سياسة نفسها أذلها الله لأمه أخرى تحكمها كما تفعل الشرائع بإقامة القيم على القاصر او السفيه وهذه حكمه ومتى بلغت امه رشدها وعرفت للحريه قدرها استرجعت عزها وهذا عدل

وبهذا أكون قد انتهيت من تلخيص ابرز ماجاء فى كتاب طبائع الاستبداد ومصارع الاستعباد لعبد الرحمن الكواكبى رحمة الله عليه
وأتمنى أن تكون الفكره وصلت

عيد سعيد

0
0



كل سنه ومصر كلها بخير مهما إمتدت أيدى الحاقدين بالأذى
وعيد سعيد على كل متابعين مذكرات psycho

عيد الحب

0
0



فرويد قال ان الصحه النفسيه هى القدره على الحب
 وعشان كده انا بقول لكل متابعين مذكرات psycho
 كل سنه وانتم قادرين تحبوا
فى الحقيقه بستغرب اوى على الناس اللى بتقول ان عيد الحب حرام!
 ليه هو الحب حرام ؟
 حرام الناس تحدد يوم عشان يتلككوا بيه ويحاولوا يحبوا بعض
 بدل ماهم بيكرهواعلى بعض ويحسدوا بعض ويحقدوا على بعض وبينكدوا بعض ؟
 ثم هو الحب لازم يكون ست وراجل  وثالثهم الشيطان؟
ماينفعشى يكون بين بنت وابوها 
ماينفعشى يكون اخت واختها
 او اخ واخته او راجل ومراته ؟
 او حب ربنا؟ 
عموما كل سنه وانتم قادرين تحبوا بعض والاحلى من كده انكم تعرفوا تحبوا بعض صح ؟
نصيحة عيد الحب: لاتعطوا حب مشروط
 وبهديلكم الاغنيه دى 

صندوق ذكرياتى

0
0


الخميس وقفة عيد الأضحى.......

كعادتى عكفت على الإهتمام بتنظيف حجرتى وترتيبها
وعندما أردت تنظيف رف من الأرفف العلوية لخزانتى، إصطدمت بصندوق ذكرياتى.
إننـا لا نحتاج قطعـا إلى الإحتفاظ بذكرياتنا الحزينة، لأنها ملازمة لنا طول الوقت... حتى إننـا بالكاد ننساها.
وجدت الصندوق وقد إمتلأ بالغبار. أخرجته من الخزانة وأزلت ما عليه من الغبار، ونظرت إليه وأنا أبتسم، ولدى رغبة ملحةفىهى أن أترك تنظيف حجرتى مؤقتا وأقوم بفتح الصندوق لأستعيد ذكرياتى...

 أو على الأدق أسترجع الشعور الذى شعرت به وقــت حـدوثها.
وقعت عينى أولا على أخر شىء وضعته فى هذا الصندوق... كانتا شمعتين تعـبران عن رقـمى 4 و 3... إنهـا الأرقام التى دلـت على عمرى وقـتئذ.
حقيقة لم أشعر يوما أنى أزداد أعواما

.........
ثم اندهشت حـينما لمحـت عيناى علبة تحتوى على معلومات عن رقم هاتفى الجديد.... لا أعلم لماذا وضعتها هنا ؟!
إن رقم الهاتف الجديد بلا شـك لا يندرج تحت ذكرياتى السعيده...
خاصـة وإن صلته بالذكريات المؤلمة كانت وطـيدة جـدا.

مجـرد قصة صداقه فاشلة دفعتنى للمضى بعيدا وتغيير رقم هاتفى.
فسـرعان ما أنهـيت تلك الصـداقة ولم أكترث ....
ومن قـال إن كـل عـلاقات الصـداقة تستمر لأخر العمر ؟

.........
 
أدهشـتنى بطاقة هوية وجدتها فى الصندوق تؤكد أنى كـنت عضواً فى الحزب الوطنى...
ضحكت... وتذكرت وقتها - حينما كنت أفتخـر بالإنضمام لهـذا الحزب الذى كان والدى رحمه الله عضوا فيه فى عهد السادات قبل أن يفسد على يد جمال مبارك.
وكيف أننى إنضممت إليه فى سن صغيره تيمنا بوالدى ...
ولم أعرف أنه سىء للغاية إلا عندما حضرت أولى إجتماعاته 

 وضحكت أكثر لأننى من مؤيدى الثوره
 ثم تخيلت كم التعليقات العامه التى سـتعتبرنى أحـد الفلول.
تضحكنى دائما كلمة فلول... وتذكرنى بتعليـق قديم كتبته عن الفساد ... وكيف شبهت مصر حـينئذ بقطعه من الكيك لذيذ الطعم ... ثم شبهت الفلول فى مصر بأعلى الكيك وقد أصابه الفساد. وكلما قطعنا االشريحة الفاسدة لنستمتع بطعـم الكيك، نجد شريحة أخرى فاسدة... وهكذا ......
.........
وجدت أيضا بعض الصور القديمه لأصدقائى وأقاربى فى مناسبات مختلفة
 وتعجبت من حال الدنيا  وكيف لم يدم شىء على حاله
 الصغير قد كبر ... والكبير مات... والأعـزب قد تزوج ... وانفصـل المتزوجون....
لكن عـلى الرغـم من ذلك فالحياة مسـتمرة رغم أنف الجميـع.

........
وقعـت عـيناى على صورة لصديقة قديمة أساءت إلى كثيرا، حـيث قطعت علاقتى بها منذ زمن... لكنى لا أعرف لماذا أحتفظت بصورتها حتى الأن. !
والأغرب من ذلك أنى لم أفكر فى تمزيقها فى كل مره أراها... وأقوم بالإحتفاظ بها - ترى ماالذى يجعلنا لا نمزق صور الآخرين بالرغم من إساءتهم الشديده لنا ؟!


 وجدت مظروفا بداخله ورقة مطوية – فتحـتها وقرأتها على عجـل.... ولم أملك إلا أن أضحك مندهشـة ممـا كـتبت وقـتذاك... كانت الورقة تحـمل أوصـاف فارس أحلامى حينما كـنت فى مرحلة المراهقه – إلا أننى تعجبت من طريقـة تفكـيرى وقـتذاك..

لقـد كنت حريصة على أن أذكر الأشياء التى لا أريدها فى فارس أحلامى مثل

( مايكونشى كذاب – مايكونشى مزيف – مايكونشى همجي- مايكونشى بخيل) ....
 لكنى لم أكتب بالفعـل ماأريده فى فارس أحلامى: مثل
(صادق - محترم - راقى- كريم ).

الغـريب أنى لا أزال حـتى اللحظـة لا أقـبل التنازل عن كثير من رغـباتى فى فارس الأحلام .... على الرغم من موافقتى على إعطاء فرصة لبعض من لا تتوفر فيـهم معظم هذه المواصفات.
أما فى بند الطباع، فقد وجـدت أنى كتبت جملة شـديدة الغرابة:
وهى: (بيشرب سجاير وهو حاطط رجل على رجل )!!!

أذكـر أنى ضحكت كثيرا - ولم أتذكـر ما كنت أقصـده فى هذه الجمله من معانى.... حـتى أنى شـعرت للحظـة أنى أقرأ ذكريات لفتاه أخرى!!

وجدت نظارة طبيه كان يسـتخدمها أبى ... حاولت أن أضعها على عـيناى لكـنى لم أطـق النظـر بها.... فكم كنت ضعيف البصر ياأبى؟ رحمك الله.
ثم وجدت الكارت الشخصى لأبى: رحمه الله...

كم ملأ قـلبى هذا الرجل الرائع حـبا وتقـديرا واحـتراما ... على الرغم من أنه تركـنىوأنا فى سن صغيره... لا أعرف عن شخصيته الكثير ... ولكـنى عرفته وفهـمته أكـثر من ثـناء الآخرين عليـه بعد رحيـله.

إبتسمت عندما وجدت صورة للسيده مريم العذراء، كانت قد أهـدتها لى صديقة مسيحية يوما كنت شـديدة الحـزن فيـه... حـيث نصـحتنى أن أتحدث إلى السـيدة العـذراء وأشكو لها ما أعـانى :D
تذكرت أنى لم أشعر وقـتها بالريبه، أو أنزعجت عندما أعطتنى صديقتى المسيحيه صورة السـيدة مريم العذراء الصديقة، عليها الصلاة والسـلام... ولم أقل لنفسى مثلا: إنها تريد تنصيرى - أو أن السـلفيين سوف يصيحون غـدا ( عايزين أختنا وفاء).... ويتجمعون فى العباسـية من أجلى...:D
لم أشعر يوما أن احـتفاظى بصـورة السـيدة العـذراء سوف يُنقص من إيمانى أو يصـيبه بخـلل ما... لكنى أحسـست أن صـديقتى المسـيحية مهتمة لأمرى وتريـد مسـاعدتى – ليس إلا.
وهذه طريقة تعبيرها عن إهتمامها بى كما ترى هى حسب عقيدتها.

المهـم أنى أخذت الصـورة منهـا وقـتذاك، وشـكرتها .... لكنى شكوت إلى الله وحـده.... لا إلى الصـورة.
لم يخطـر ببـالى أبدا أن يكون بينى وبين ربى وسيط ... حتى السيد البدوى و سيدنا الحسين اللذان أشعر دائما براحة عجـيبة بجـوارهما... لم أفكر فى أن أطـلب من أى منهما المسـاعدة كما يفعـل بعض الجهـال.

لطالما أشـعر دائما بأننا نستطيع أن نتعايش سلميامسلمين ومسيحين معا تحـت سـقف واحـد.... حيث السـلم الإجتماعى الجميـل الذى عـرفته مصر على مر التـاريخ... لكن للأسـف الشـديد - يوجد بيننا دائما من الطرفين من له مصـلحة فى أن تُشـوه هـذه العـلاقة وتسـتمر فى جو مقلق من التـوتر والضـغائن.... لا سـامح الله هؤلاء الأفاقـين الخـائنيـن.
إن مشكلتنا كشعب – هى إننا لا نفهـم ولم نتعـلم كـيف نتقـبل الأخر 
.......
لفتت انتباهـى ورقة قديمة مطوية فى أحد جوانب الصندوق ... عندما فتحـتها برفـق شـديد، شـعرت بمزيـج من السـعادة والشـغف ... لقد كانت صفحة كاملـة من أحـد الكـتب الدراسـية فى المرحلة الثانوية. أخذتها من شخص (فاشل دراسيا)... وهو إبن صديقة للعائلـة - كان يكبرنى بأعوام قليلة... لكـنه مع ذلك كان يدرس معى فى نفس السنة.
وقد خـط بيـده على هـذه الورقـة: جملتين:
1- يا من إسمك يحمل....... لقد ضاع حبى هباء
2- ترى أتحملين لى من إسمك شيئا؟

أذكر أنى حينما قرأت هـذه الكلمات للمـرة الأولى، لم يكـن صـعبا أن أضـع إسـمى مكان النقط... حـتى يكتـمل المعـنى الشعرى الذى يقصـده هو... ثم تذكـرت أيضـا أن رد فعلى كـان شديد القسوة عندما اتصل هو بى هاتفيا فيـما بعـد .... وصـرح لى بحبه.
قـلت له وقـتها: ( روح إنجح الأول يابابا وبعدين حب)... ثم أنهـيت الحديث بعـنف.... العجـيب أنه نجح بالفعل فى تلك السنه ... بعد تكـرار رسوبه كثيـرا... لكـنه ابتعد عنى نهائيا.... وكأنه كان يريـد أن يقول: (هانجح ... بس هابطل احبك)....
لم أكترث بحـاله ولا بكـلامه... فقد كان لا يعنى لى شيئا من الأسـاس.
.........

إنتهيت من الصندوق ... وكدت أن أعيد كل شىء إلى مكانه، إلى أن لمحـت عيناى قطعة حلوى ... إبتسمت عندما ذكرتنى هـذه الحـلوى بأحد الأشخاص الذين قابلتهم فى حياتى .... لقـد أهدانى قطعة حلوى لم أشـأ التخلص منها، حتى أتذكره بهـا دائما.

هـذا الشخص النبيـل لم يسـبب لى الآلام يوما.... لكنه جـعلنى دوما أشـعر بأن الحـب هو غـاية الرقـة والروعـة...
قلما يوجد رجل تشعر معـه المرأه بأنوثتها... فلا يعكـر صـفوها، ولا يجـرحها... إنه فقـط يغذيهـا برعـايته وعـنايته وصـدقه كى تمنحـه هى قلبها بكـل امتنان.

عُدل لغويا بواسطه /
أ/ محمد الشناوى  
Viewing all 65 articles
Browse latest View live




Latest Images